قبل مواجهة الأرجنتين.. حسام حسن يوجه نداءً إنسانيًا للعالم: خلوا فلسطين تعيش
ردّ حسام حسن، المدير الفني لـ منتخب مصر على سؤال صحفية تركية خلال المؤتمر الصحفي الخاص بمواجهة مصر والأرجنتين في أتلانتا، بشأن رفعه علم فلسطين عقب مباراة أستراليا، وإمكانية تكرار هذه اللفتة.
وقال حسام حسن: “كل واحد وله مشاعره، وإذا وُجد فرد في العالم محسش بالشعب الفلسطيني، ميبقاش بني آدم أياً كان، سواء الشخص ده عربي أو أوروبي أو أمريكي أو أي حاجة”.
وأضاف حسام حسن، “إحنا دايمًا حتى الشعوب في أوروبا وفي العالم وفي أمريكا، لو في حيوان حد قسي عليه أو آذاه بيطلع حقوق الإنسان وحقوق الحيوان وحقوق الدنيا كلها، لكن كل يوم بني آدمين بالآلاف بيتقتلوا وأطفال وستات والعالم لا يتحرك”.
وتابع المدير الفني لمنتخب مصر “لما نكون إحنا قاعدين في تكييف وقاعدين في قصور والأكل قدامنا، وأطفال وشعوب قاعدة في خيام في الشتا وفي الصيف وتحت الشمس، والشعب الفلسطيني قاعد في العراء”.
واستكمل،” مبيصعبش علينا الأطفال اللي بنشوفهم مش لاقيين ياكلوا؟، والمرض والوباء ممكن ينتشر من قلة الأكل ومن قلة النومة ومن قلة العيشة؟/ فأنا لو محسيتش كبني آدم، يبقى أنا مليش لازمة إني أعيش، أو أي بني آدم على وجه الأرض محسش باللي بيحصل في فلسطين – بغض النظر عن هو مسلم أو مسيحي أو يهودي – يبقى مش بني آدم.
وأضاف “إذا أصرينا إننا نغمض عينينا والناس اللي في إيدها القرار متاخدش قرار، يحطوا نفسهم ويحطوا ولادهم يوم واحد بس يعيشوا في الشارع في الشمس وفي المطر وفي البرد، ويجربوا يعيشوا”.
وقال أيضًا “إحنا لما بيحصل سيول هنا الناس بتستخبى وتجري، لكن السيول بتحصل في غزة وفلسطين والناس مش لاقية حاجة تتدفى بيها ولا تصد المطر ولا تروح عن أشعة الشمس”.
وشدد المدير الفني لمنتخب مصر “عار علينا كلنا، عار على العالم كله، مش الوطن العربي بس، عار على أصحاب القرار اللي سايبين بني آدمين زينا زيهم، النهارده يبقى عادي إن 1000 أو 2000 أو 3000 أو 4000 يموتوا بصاروخ؟”.
وأضاف “إحنا هنا الشعوب كلها بما فيهم أوروبا وأمريكا بنبص على حاجة تانية، ويمكن المسؤولين هناك بيشوفوا صورة مختلفة، أنا مش بتكلم عن إسلام ولا مسيحية ولا يهود، أنا بتكلم عن الإنسان”.
واختتم حسام حسن، المدير الفني لمنتخب مصر، تصريحاته قائلاً: “شعوري طلع من نفسي لأني بني آدم، أنا إنسان قبل ما أكون هويتي إيه أو ديني إيه أو عربي ولا أجنبي، رسالتي من خلال كرة القدم باعتبارها القوة الناعمة في العالم، أرجوكم، كل الرياضيين وكل الإعلاميين بمختلف أديانهم ودولهم، خلوا الشعب الفلسطيني يعيش، يعيش بس، عايزين “Respect” للبني آدم و”Fair” إن الشعوب تعيش.
